miðvikudagur, 17. júlí 2019
 
TölublöðVenjuleg útgáfa

Við hesthúshorn Sleipnis

9. febrúar 2011 kl. 00:03

Við hesthúshorn Sleipnis

Æskulýðsnefnd Sleipnis hefur sett af stað námskeið í reiðhöllinni og fyrsta námskeiðinu er lokið...

Það var hinn magnaði reiðkennari og hestamaður Þorvaldur Árni Þorvaldsson sem reið á vaðið og var með námskeið fyrir börn. Nú er fróðlegt að skoða heimasíðu Sleipnis og sjá allt fjörið sem slíkri höll fylgir. Reiðhöllin verður ekki síst kennsluhöll sem gefur börnum og unglingum tækifæri til að kynnast hestinum og gerast hestamenn undir leiðsögn meistaranna. Út febrúar verður Sleipnismönnum frjálst á þeim tímum sem ekki er boðuð dagskrá að kynnast aðstöðunni og þjálfa sig og hestinn sinn án endurgjalds. Folaldasýning þeirra Villingaholtshreppsmanna var einnig brautryðjandastarf í höllinni. Sýningin var vel heppnuð þar mætti  hundrað manns og tuttugu og þrjú  folöld sprettu úr spori á vel heppnaðri sýningu. Bændur í Egilsstaðakoti voru sigursælir og hrepptu flest verðlaun,en að hætti hógværra Flóamanna steig þeim það ekki til höfuðs.  Hraungerðisdeild hrossabænda heldur svo sína folaldasýningu í Halakoti á sunnudaginn kemur samkvæmt venju á búgarði Svönu og Einars Öders. Mikið hefði nú verið gaman ef Kristinn minn Helgason bóndi í Halakoti og hestamaður af guðsnáð  hefði haft slíka aðstöðu þegar hann tamdi Þingmannsjarp fyrir föður minn og Glæsi sinn,þá hefðu fleiri slíkir hestar orðið til. Ólyginn sagði mér að hrossabúgarðarnir í Ölfusinu væru einir tuttugu en aðeins eitt kúabú í sveitinni þar sem áður var nóg af mysu og mjólk. Tíminn stendur aldrei í stað og má það ekki.  Sem betur fer er aðstaðan önnur og betri,hestamenn ekki síður en kúabændur gera kröfur um aðstöðu og þekkingunni fleygir fram. Hilmar Pálsson náði góðum samningi fyrir Sleipnismenn við knattspyrnudeild Selfoss þá Óskar Sigurðsson formann  og Sveinbjörn Másson þeir veittu með gleði leyfi fyrir því að áhorfendastúkurnar af gamla vellinum yrðu fluttar inní reiðhöllina í vetur. Er það von mín og trú að fyrir slíkan greiða fái knattspyrnudeildin slíkt borgað í gæfu og gengi. Megi knötturinn dynja í marki andstæðinganna og að á ný náum við uppí meistaradeild. Ennfremur að markaskorarinn mikli Sævar Þór Gíslason komi vel undan vetri og eigi góða spretti en hann rekur ættir sínar til Hurðarbaksmanna sem mestir íþróttamenn eru og flestir góðir hestamenn. Athyglin sem Íslenski hesturinn vekur  tekur engan enda nú gerðist það að einn vinsælasti tölvuleikur heims sem 60 milljónir manna stunda fær verkefni með hestinum okkar. Notendur leiksins geta keypt íslenska hestinn fyrir sérstakan FarmVille gjaldeyri,geymt hestinn í sýndarhesthúsi og ræktað gæðinga sem þeir geta deilt með öðrum notendum leiksins. Þetta er auðvitað góð athygli og segir til um vinsældir hestsins um víða veröld. Ekki hefði afa og ömmu dottið þetta í hug,hún hefði slegið á lær sér og hann glott við tönn og tekið í nefið. Hvað þá að Snati gamli íslenski fjár-hundurinn væri orðinn mestur og bestur á hundasýningu í Bandaríkjunum. Hænan kýrin og sauðkindin vekja ekki minni athygli.
                                                                                    Guðni Ágústsson
                                                                                   gudni.ag@s