miðvikudagur, 24. júlí 2019
 
TölublöðVenjuleg útgáfa

Ungir og efnilegir á ís

31. mars 2014 kl. 19:20

Ölnir frá Akranesi

Stóðhestakynningin á Ístöltinu

Stóðhestakynningin á Ístöltinu er alltaf spennandi dagskrárliður þessa glæsilega kvölds og hestamenn geta farið að láta sér hlakka til laugardagskvöldsins 5. apríl n.k. Um átta stóðhestar mæta í Laugardalinn ásamt knöpum sínum og sýna hrossaræktendum kosti sína á svellinu.

 

Hér verða fyrstu þrír stóðhestarnir kynntir.

 

Ölnir frá Akranesi er foli á fimmta vetur og varð annar hæst dæmdi 4v stóðhesturinn 2013. Hann er undan Glotta frá Sveinatungu og Örk frá Akranesi. Ölnir hlaut 8.33 í aðaleinkunn, þar af 9.0 fyrir tölt og vilja og geðslag. Ölnir er úr ræktun Smára Njálssonar og í eigu Margrétarhofs.

 

Pistill frá Litlu-Brekku verður sjö vetra í vor. Hann er undan Mola frá Skriðu og Prinsessu frá Litla-Dunhaga (Baldursdóttir frá Bakka). Pistill fyrstu verðlauna klárhestur með 9.0 fyrir tölt, brokk og fegurð í reið og 8.10 í aðaleinkunn. Pistill er ræktaður af Vigni Sigurðssyni og fjölskyldu og í eigu Hestvits.

 

Daggar frá Einhamri er annar efnilegur foli á fimmta vetur og hlaut 8.42 fyrir hæfileika í fyrra aðeins 4v gamall, þar af 9.0 fyrir tölt og vilja og geðslag. Daggar er undan Orra frá Þúfu og Gustu frá Litla-Kambi (Gustsdóttir frá Hóli). Daggar er úr ræktun hjónanna Hjörleifs Jónssonar og Sifjar Ólafsdóttur í Einhamri við Akranes og jafnframt í þeirra eigu.

 

Miðar á Ístölt verða seldir í Líflandi, Top Reiter og í verslun Baldvins og Þorvaldar á Selfossi frá og með þriðjudeginum 1. apríl.