fimmtudagur, 19. september 2019
 
TölublöðVenjuleg útgáfa

Skeifudagurinn – Sumardaginn fyrsta!

19. apríl 2013 kl. 11:13

Skeifudagurinn – Sumardaginn fyrsta!

„Sumardaginn fyrsta verður haldinn hátíðlegur Skeifudagur Grana á Mið-Fossum í Andakíl sem er hestamiðstöð LbhÍ. Grani er hestamannafélag nemenda við Landbúnaðarháskóla Íslands. Þennan dag sýna nemendur í hrossarækt við LbhÍ afrakstur vetrarstarfsins í reiðmennsku og frumtamningum. Reiðkennari nemenda í vetur er Heimir Gunnarsson. 

 
Dagskrá: 
13:00 - Setningarathöfn 
Sýningaratriði reiðkennara 
Kynning á frumtamningatryppum 
Úrslit í keppni um Reynisbikarinn 
Úrslit í keppni um Gunnarsbikarinn 
15:00 - Verðlauna afhending og útskrift Reiðmanna í mötuneyti skólans.
 
Þar verður m.a. Morgunblaðsskeifan, en hún er veitt fyrir bestan samanlagðan árangur úr verklegum hluta í Hrossarækt III.
 
Reiðmaðurinn
 
– tveggja ára námskeiðsröð fyrir áhugafólk um reiðmennsku
 
Reiðmaðurinn er nám ætlað fróðleiksfúsum hestamönnum og áhugafólki um reiðmennsku sem vill auka við þekkingu sína og færni í reiðmennsku, hrossarækt og almennu hestahaldi. Reiðmaðurinn er tveggja ára nám. Námskeiðið er byggt upp af námi í reiðmennsku og er megináherslan lögð á það í gegnum fjórar verklegar helgar á önn en einnig er þetta almennt bóklegt nám sem tekið er í fjarnámi og einni helgi í staðarnámi. Námið er metið til samtals 33 framhaldsskólaeininga (ECVET) og lýkur námskeiðsröðinni með sérstakri viðurkenningu frá Landbúnaðarháskóla Íslands. Slík einingagjöf metur þá lágmarks vinnu sem ætlast er til að nemendur leggi fram og er háð því að nemendur hafi sótt 90% verklegra tíma í staðarnámi og standist námsmat. Að baki hverrar einingar er gert ráð fyrir 3 heilum vinnudögum nemandans, hvort sem um er að ræða verklega tíma eða heimanám. Mikil áhersla er lögð á markvissa heimavinnu á milli verklegra helga. Umsækjendur þurfa að hafa náð 16 ára aldri. Sjá nánar á www.lbhi.is/namskeid.  Reiðmenn eiga þess kost að taka þátt í Reynisbikarnum. Forkeppni fer fram innan hvers hóps en tveir til þrír frá hverjum námshópi taka þátt í undankeppni og svo úrslitum á Skeifudaginn. Reynisbikarinn er til minningar um tamningameistarann Reynir Aðalsteinsson sem var upphafsmaður og hugmyndasmiður Reiðmannsins.
 
 
 
Reiðmaðurinn 2011-2013 
Er kenndur í Rangárhöllinni á Hellu og Víðidal í Reykjavík.  Útskrifast á Skeifudaginn!
 
Reiðmaðurinn 2012-2014 
Er kenndur á Miðfossum, Akureyri, Selfossi, Víðidal í Reykjavík og á Flúðum.
 
Reiðmaðurinn 2013-2015
Opið er fyrir umsóknir!
 
 
Þeir sem áhuga hafa á náminu sækja um það í gegnum umsóknarsíðu skólans, www.lbhi.is . Muna þarf að Reiðmaðurinn er starfsmenntanám á framhaldsskólastigi. Viðkomandi velur það landssvæði sem hann vill taka verklega hlutann. Þegar búið er að fara yfir umsóknir og veita jákvæð svör, kemur að því að staðfesta þátttökuna með greiðslu á staðfestingargjaldi. 
 
Ef áhugahópur er til staðar innan ákveðins hestamannafélags kemur vel til greina að hefja næsta skólaár á viðkomandi stað, uppfylli staðurinn þær kröfur sem settar eru vegna kennslunnar og næg þátttaka fyrir hendi. Hafið samband við Endurmenntun LbhÍ og málið verður skoðað. Verkefnisstjóri Reiðmannsins er Ásdís Helga Bjarnadóttir – endurmenntun@lbhi.is  eða sími 433 5000.
 
Opið hús í Garðyrkjuskólanum – Sumardaginn fyrsta!
 
Að venju verður opið hús í Garðyrkjuskólanum – Starfsstöð Landbúnaðarháskóla Íslands - á sumardaginn fyrsta, 25 apríl. Opna húsið hefst kl. 10 og lýkur kl. 18. Garðyrkjuskólinn er á Reykjum – rétt hjá sundlauginni í Hveragerði. Heimsókn að Reykjum er fastur liður í hátíðarhöldum hjá mörgum á sumardaginn fyrsta. Andlitsmálning og leikir fyrir börnin 
Kynning á námsbrautum skólans. Garðyrkjuverðlaun 2013 veitt og margt fleira á dagskrá.  Brakandi ferskt hnúðkál, kryddjurtir og grænmeti til sölu,“segir í tilkynningu frá LbhÍ