sunnudagur, 21. júlí 2019
 
TölublöðVenjuleg útgáfa

Sigríður Björnsdóttir er dýraverndari ársins

17. apríl 2015 kl. 14:38

Sigríður Björnsdóttir, dýralæknir hrossasjúkdóma hjá MAST.

Dýraverndasamtökin heiðra Sigríði fyrir störf sín í þágu velferðar hesta.

Sigríður Björnsdóttir, dýralæknir hrossasjúkdóma er Dýraverndari ársins 2015.

Dýraverndarsamband Íslands munu veita Sigríði viðurkenninguna við hátíðlega athöfn á morgun, laugardag.

,,Sigríður Björnsdóttir er valin fyrir ötula vinnu í þágu velferðar hesta undanfarin ár. Hún hefur beitt sér fyrir almennri velferð hesta, m.a. með því að vinna gegn óhóflegri tannröspun og tannslípun hesta sem sýnt hefur verið fram á að sé óþörf og geti valdið þeim viðvarandi tannverk. Einnig hefur hún unnið að rannsóknum sem sýna fram á arfgengi sársaukafullrar liðakölkunar í afturfótum hesta (spatt), sem í kjölfarið hefur verið reynt að koma í veg fyrir við ræktun íslenska hestsins. Jafnframt hefur Sigríður sýnt fram á að notkun ákveðinna beislisméla valdi beinhimnubólgu með þrýstingi á kjálkabein hrossa og hafa þau mél nú verið bönnuð við keppni og sýningar á íslenskum hestum vegna dýravelferðarsjónarmiða," segir í tilkynningu og telur Dýraverndarsambandið að vinna Sigríðar í þágu hesta hafi ótvírætt bætt velferð þeirra og framtíð og vill veita henni viðurkenningu fyrir hennar starf.

Sigríður mun veita viðurkenningunni viðtöku á morgun laugardag, þann 18. apríl klukkan 14:00, í húsnæði Dýraverndarsambandsins að Grensásvegi 12A (bakhús) þar sem Dýraverndarsambandið veita fleiri viðurkenningar fyrir störf í þágu velferðar dýra á Íslandi.