mánudagur, 19. ágúst 2019
 
TölublöðVenjuleg útgáfa

Ruglaðir flytja hinn hrossamóðu

27. nóvember 2012 kl. 09:11

Tollgæslan í Reykjavík stöðvaði síðastliðinn föstudag sendingu frá Þýskalandi sem hafði að geyma reiðtygi.

Lítil takmörk virðast fyrir því hve hestfólk er ruglað. Í annað sinn á stuttum tíma reynir hestamaður að flytja inn notuð óhrein reiðtygi með villandi upplýsingar í innflutningspappírum. Eftirfarandi frétt birtist á vef Tollgæslunnar í gær:

„Tollgæslan í Reykjavík stöðvaði síðastliðinn föstudag sendingu frá Þýskalandi sem hafði að geyma reiðtygi. Innihaldið var, á fylgiskjölum, sagt vera notuð reiðtygi sem búið væri að sótthreinsa. Um var að ræða hnakk með ístöðum og gjörðum, auk undirdýnu. Við skoðun á sendingunni  reyndust reiðtygin vera notuð og óhreinsuð.

Tollgæslan hafði samband við Matvælastofnun og kom fulltrúi hennar og skoðaði reiðtygin. Í  framhaldi af því var  sendingin  stöðvuð.

Málið er komið í  hefðbundinn farveg hjá Matvælastofnun.

Þetta er í annað sinn á skömmum tíma sem tollgæslan stöðvar innflutning á notuðum reiðtygjum til landsins.  Við innflutningseftirlit á Seyðisfirði þann 13. nóvember síðastliðinn stöðvaði tollgæslan innflutning á notuðum  reiðtygjum. Um var að ræða hnakk, ólíkar gerðir múla, gjarðir, hlífar, píska, hestaábreiðu, reiðhanska og fleira.   Samkvæmt tilkynningu frá MAST verður það mál kært til lögreglu og umræddum reiðtygjum fargað.

Tollgæslan minnir á að innflutningur notaðra reiðtygja og reiðfatnaðar, sem ekki hefur verið sótthreinsaður, er er með öllu bannaður. Mikil hætta er á að notuð reiðtygi og ósótthreinsaður reiðfatnaður beri með sér smitefni sem valdið getur alvarlegum dýrasjúkdómum hér á landi.“