mánudagur, 22. júlí 2019
 
TölublöðVenjuleg útgáfa

Reiðhöll seld á uppboði

odinn@eidfaxi.is
18. október 2013 kl. 14:37

Reiðhöll Freyfaxa á Iðavöllum

Verða að standa saman um nýtingu hallarinnar og tryggja rekstrargrundvöll.

Reiðhöll hestamannafélagsins Freyfaxa var seld á uppboði nú á dögunum, en kaupandin er fasteignafélag Fljótsdalshéraðs.  Kaupverðið er 22,5 milljónir en skuld upp á um 20 milljónir var félaginu sem átti höllina ofviða.

Deildar meiningar eru á hvers vegna þessi skuld var svo há sem um ræðir en á sínum tíma var gert átak í byggingum reiðhalla í kjölfar sölu eigna á Stóðhestastöðinni í Gunnarsholti. Þá lagði ríkið fram fé til reiðhallarbygginga víða um land og lögðu sveitarfélög í flestum landshlutum krónu í framlag á móti hverri krónu sem ríkið lagði til. Þannig var því háttað fyrir austan og félag um reiðhöllina á Iðavöllum stofnað í eigu Freyfaxa og sveitarfélagsins.

Framlag kom frá ríki en það var lægra en áætlað var í upphafi vegna þess að hallirnar urðu fleiri á landsvísu en áætlað var og því skiptist potturinn á milli fleiri félaga. Þetta þýdda að framlag lækkaði frá ríki til reiðhallarinnar á Iðavöllum og þá að sama skapi lækkaði framlag sveitarfélagsins í hlutfalli við það. Þannig varð til um 13 milljóna skuld sem á endanum varð félaginu að falli.

Jafnframt hefur fé sem vilyrði var um að kæmi til frá ríkinu ekki skilað sér, en það átti að koma til vegna kaups félagsins á landi undir mótssvæði. Það land var keypt af ríkinu og rann andvirði þeirra kaupa í jarðarsjóð ríkisins, en vilyrðið var upp á að sama upphæð kæmi frá ríkinu til uppbyggingar á svæði Freyfaxa. Enn bólar ekkert á þessu fé.

Í samtali við Eiðfaxa segir Stefán Bogi Sveinsson forseti bæjarstjórnar að fé þetta sem vilyrði var fyrir hefði líklega getað bjargað því að svona fór. “Þessi kaup sveitarfélagsins eiga engu að breyta um aðgang hestamanna að reiðhöllinni, enda eru þessi kaup gerð í þeim tilgangi að tryggja hestamönnum aðstöðu til að stunda sína íþrótt. Núna verða þeir sem málið varðar að standa saman um nýtingu hallarinnar og sjá til þess að rekstrargrundvöllur hennar sé tryggur”

Þessi kaup hafa verið gagnrýnd en Karl Lauritzson bæjarfulltrúi gagnrýndi þá forgangsröðun sem hann telur kaupin endurspegla. “Það kreppir að í rekstri sveitarfélagsins og spurning hvort peningunum hefði verið betur varið í annað” og bætir við að réttara hefði verið að fá álit íþrótta-, og tómstundanefndar um málið en það var ekki gert. Karl vill þó að það komi skyrt fram að hann er ekki á móti því að fé renni til hestaíþróttarinnar, en vinna verði málin rétt. Gunnar Jónsson  bæjarfulltrúi  segir hins vegar að kaupin hafa verið ákvörðun um að verja starfsemina í reiðhöllinni.

Fjallað er um þetta mál í Fréttablaðinu í dag.