þriðjudagur, 18. júní 2019
 
TölublöðVenjuleg útgáfa

Mette Mannseth orðin meistari

1. ágúst 2013 kl. 22:38

Mette Mannseth og Þáttur frá Þúfum. Mynd: Sigrún Ólafsdóttir

Fyrst kvenna til að hljóta titilinn.

Mette Mannseth er orðinn tamningameistari eftir að hafa þreytt meistarapróf félags tamingamanna  í dag. Prófið fór fram á Hólum í Hjaltadal en Mette var á þeim Hátt frá Þúfum,  Hnokka frá Þúfum og Ró frá Þúfum. Háttur og Hnokki eru bræður og eru báðir í eigu Mettu. Metta hefur lagt mikinn metnað og ástundun við þjálfun þeirra og hefur náð góðum árangri í keppni m.a. voru hún og Hnokki í A úrslitum í A flokki á LM2011. Báðir eru þeir með feikna háan kynbótadóm. Mette er öllum hestaunnendum vel kunn og hefur þótt skara fram úr hvað varðar góða og prúða reiðmennsku. Þetta er efsti titill sem hægt er að öðlast sem tamningamaður og reiðkennari. Mette er vel að þessu komin og óskar Eiðfaxi henni til hamingju.

Fimm knapar höfðu áður hlotið þennan titil en það eru þeir Eyjólfur Ísólfsson, Reynir Aðalsteinsson, Benedikt Líndal, Sigurbjörn Bárðarson og Þórarinn Eymundsson. Gaman er að sjá kvenmann bætast í hópinn með þessum miklu reiðsnillingum. 

Meistarapróf félags tamningamanna er annars vegar sýnikennsla og hins vegar reiðpróf. Mette var með Hnokka í reiðprófinu en hesturinn þarf að vera alhliðahestur. Prófið fer fram á hringvelli og í sýningunni þarf að koma fram öll þjálfunarstig hestsins - frá slökun upp í söfnun og yfirferð. Mette var með Hátt og Ró í sýnikennslunni. Í sýnikennslunni þarf að sýna ákveðið atriði í lágmark 30 mín og þarf verkefnið að vera samþykkt af prófnefnd. Verkefni Mettu var sveigjanleiki.

Prófdómarar voru Anton Páll Níelsson, Eyjólfur Ísólfsson og Benedikt Líndal

"Til þess að þreyta meistarapróf FT þarf próftakinn að hafa unnið ýmis afrek á sviði hestamennsku. Próftaki þarf að hafa haft tamningar og þjálfun hrossa að aðalatvinnu í minnst 12 ár, verið virkur reiðkennari í það minnsta 8 ár og kennt og þjálfað nemendur á hæðasta stigi reiðmennsku. Skilað frá sér fagskrifum um reiðmennsku og þjálfun sem birst hafa verið í viðurkenndum tímaritum og bókum. Próftaki skal hafa lokið öllum prófstigum FT" segir Sigrún Ólafsdóttir formaður félags tamningamanna og bætir einnig við að próftaki skal hafa vakið athygli fyrir fagleg vinnubrögð í hvívetna og sýnt fram á frábæran árangur í keppni og sýningum.