þriðjudagur, 23. júlí 2019
 
TölublöðVenjuleg útgáfa

Hólaskóli óskar eftir hrossum

19. nóvember 2013 kl. 12:00

í framtamningu, grunnþjálfun og þjálfun.

Hólaskóli hefur um árabil átt gott samstarf við ræktendur um allt land, um að senda skólanum hross til tamningar og þjálfunar, sem 2. árs nemar við hestafræðideild annast undir handleiðslu reiðkennara skólans.

Nú er leitað eftir hrossum í vinnuna á vorönn 2014.  

Kallað er eftir hrossum í þessi verkefni:

Frumtamning. Grunnvinna, sem miðar fyrst og fremst að því að gera trippin reiðfær. Samhliða er lögð áhersla á teymingar og aðra vinnu við hendi.

Forkröfur: Trippin komi fortamin (a.m.k. bandvön). Þau þurfa að hafa náð góðum þroska. Æskilegt er að þau séu undan 1. verðlauna stóðhestum.

Frumtamningartrippi komi á staðinn föstudaginn 3. janúar 2014.
Skiladagur laugardagurinn 22. febrúar.

Grunnþjálfun. Í grunnþjálfun er megináhersla lögð á að gera hrossin góð í beisli, þjálfa samspil hvetjandi og hamlandi ábendinga, sem og gangsetningu. Enn fremur uppbyggingu þreks, jafvægis og vilja.

Forkröfur: Grunnþjálfunin er framhald frumtamningar. Trippin skulu vera vel reiðfær utan dyra og teymast vel með manni. 
Til að tíminn nýtist sem best, þurfa trippin að vera orðin heyjuð, auk þess að koma járnuð og í nokkurri þjálfun.

Hross í grunnþjálfun komi á staðinn föstudaginn 3. janúar 2014.
Skiladagur laugardagurinn 22. febrúar.

Þjálfun. Fyrir (meira) tamin hross á 5. -12. vetri af öllu tagi en þó eru ekki tekin gölluð hross eða hættuleg (s.s. hrekkir, rokur, slægð, húslestir). Við komuna á staðinn þurfa þau að vera í lágmarksþjálfun. Þetta námskeið snýst um alhliða þjálfun reiðhests með áherslu á bætta svörun ábendinga, jafnvægi, hreyfingar og rými á öllum gangtegundum.

Forkröfur: Hrossin þurfa að vera heilbrigð og laus við galla, svo sem slægð, hrekki, húslesti eða áberandi viðkvæmni eða kaldlyndi.
Hross sem koma  í  þjálfun skulu vera orðin heyjuð, komin í þjálfun, og járnuð.

Hross í þjálfun komi á staðinn föstudaginn 24. janúar 2014.
Skiladagur föstudagurinn 21. mars.

Kostnaður - fyrir allt viðkomandi tímabil (ber ekki virðisaukaskatt), er kr.75.000.
Innifalið: Allt uppihald, auk járninga (ef við á) og ormalyfsgjafar.

Þeim sem hafa hug á að koma að hrossum í eitthvert þessara námskeiða, er bent á að leggja inn pöntun sem allra fyrst. Pantanir skulu skráðar í þetta eyðublað hérna.