föstudagur, 23. ágúst 2019
 
TölublöðVenjuleg útgáfa

Hafliði liðstjóri landsliðsins

11. maí 2012 kl. 14:47

Hafliði liðstjóri landsliðsins

Landssamband hestamannafélaga hefur að tillögu landsliðsnefndar LH ráðið Hafliða Halldórsson sem liðsstjóra íslenska landsliðsins í hestaíþróttum og gildir samningurinn bæði fyrir Norðurlandamótið í Eskilstuna í Svíþjóð í sumar, sem og fyrir Heimsmeistaramótið í Berlin 2013. Mun hann hefja vinnu og undirbúning beggja móta strax. 

 
Hafliða Halldórsson á Ármótum á Rangárvöllum þarf vart að kynna fyrir þjóðinni en hann. Hann er gríðarlega reyndur keppnisknapi, margfaldur Íslandsmeistari og heimsmeistari í tölti 2001 á Valíant frá Heggsstöðum.
Hafliði er maður með reynslu og hefur áður verið liðsstjóri landsliðsins bæði á HM og NM og nú síðast á HM í Austurríki. 
LH býður Hafliða velkominn til starfa og hlakkar til samstarfs við hann. 
Um leið vill landsliðsnefnd LH minna á umsóknarfrest til þátttöku á NM:
Norðurlandmót í hestaíþróttum verður haldið dagana 2. -5. ágúst í Eskilstuna í Svíþjóð. Í Eskilstuna eru aðstæður góðar og keppnisvæðið mjög skemmtilegt. 
 
Keppt verður í öllum hefðbundnum greinum hestaíþrótta í tveimur aldurflokkum:
•    15 - 21 árs (21 árs á árinu) - Unglingar og ungmenni, alls 8.
•    22 ára og eldri – Fullorðnir, alls 10.
 
Þeir sem hafa áhuga á að keppa fyrir Íslands hönd á mótinu eru vinsamlegast beðnir um að senda inn umsókn.
Í umsókninni þarf að koma fram: Nafn, heimilisfang, sími, aldur og netfang. Einnig þarf að koma fram keppnisreynsla og telja þarf upp helstu afrek á keppnisvellinum.
 
Knapar útvega sér hross fyrir mótið sjálfir, í samráði við liðstjóra, en hægt er að aðstoða ungmenni ef þess gerist þörf.
 
Við hvetjum sem flesta til að sækja um en reynsla af þátttöku á Norðurlandamóti er frábært veganesti fyrir alla hestaíþróttamenn og konur.
 
Umsóknum þarf að skila inn til Landssambands hestamannafélaga í síðasta lagi 21.maí.
 
Bréflega: Landssamband hestamannafélaga, Engjavegur 6, 104 Reykjavík.
Tölvupóstur: lh@isi.is
Fax: 514 4031.
 
Allar upplýsingar um mótið er hægt að fá á skrifstofu LH í síma 514 4030 eða hafa samband við Hafliða Halldórsson liðsstjóra í síma 896 3636.
 
Bestu kveðjur,
Landsliðsnefnd LH