þriðjudagur, 23. júlí 2019
 
TölublöðVenjuleg útgáfa

Frumtamning og þjálfun á haustönn - pantanir

4. júlí 2013 kl. 12:51

Nú er leitað eftir hrossum í vinnuna á haustönn 2013

Hólaskóli hefur um árabil átt gott samstarf við ræktendur um allt land, um að senda skólanum hross til tamningar og þjálfunar, sem 2. árs nemar við hestafræðideild hafa annast undir handleiðslu reiðkennara skólans.

Nú er leitað eftir hrossum í vinnuna á haustönn 2013.  Önninni er skipt upp í tvö tímabil, og stendur hið fyrra frá 26. ágúst til 19. október, en hið síðara frá 21. október til 14. desember.

Kallað er eftir hrossum í þessi verkefni á fyrra tímabili haustannar, 26. ágúst til 19. október:

Frumtamning. Grunnvinna, sem miðar fyrst og fremst að því að gera trippin reiðfær. Samhliða er lögð áhersla á teymingar og aðra vinnu við hendi.

Forkröfur: Trippin komi fortamin (a.m.k. bandvön). Þau þurfa að hafa náð góðum þroska. Æskilegt er að þau séu undan 1. verðlauna stóðhestum.

Hugsanlegt er að hross sem eru í frumtamningu á fyrra tímabili, geti haldið áfram í grunnþjálfun á hinu síðara, sé þess óskað. Það er þó ekki sjálfgefið að unnt verði að haga málum þannig.

Þjálfun
. Fyrir (meira) tamin hross á 5. -12. vetri af öllu tagi en þó eru ekki tekin gölluð hross eða hættuleg (s.s. hrekkir, rokur, slægð, húslestir). Við komuna á staðinn þurfa þau að vera í lágmarksþjálfun. Þessi áfangi er alhliða þjálfun reiðhests með áherslu á bætta svörun ábendinga, jafnvægi, hreyfingar og rými á öllum gangtegundum. 

Forkröfur: Hrossin þurfa að vera heilbrigð og laus við galla, svo sem slægð, hrekki, húslesti eða áberandi viðkvæmni eða kaldlyndi.

Hross sem koma í  þjálfun skulu skilyrðislaust vera í þjálfun, og járnuð.

Opnað verður fyrir pantanir í grunnþjálfun (síðara tímabil) í september. Forkröfur fyrir grunnþjálfun eru að hrossin séu frumtamin.

Kostnaður - fyrir allt viðkomandi tímabil (ber ekki virðisaukaskatt), er kr.75.000. 

Innifalið: Allt uppihald, auk járninga (ef við á) og ormalyfsgjafar. Þeim sem hafa hug á að koma að hrossum í eitthvert þessara námskeiða, er bent á að leggja inn pöntun sem allra fyrst. Pantanir skulu skráðar í þetta eyðublað hér.