laugardagur, 18. nóvember 2017
 
TölublöðVenjuleg útgáfa

Stórsýning Fáks

19. apríl 2017 kl. 17:10

Konsert frá Hofi hefur skipað sér í flokk með vinsælustu stóðhestum landsins.

Gæðingar munu leika listir sýnar

Konsert frá Hofi og Jakob S Sigurðsson mæta á Stórsýningu Fáks næstkomandi laugardagskvöld. Konsert setti heimsmet í flokki 4 vetra stóðhesta á Landsmótinu 2014 á Hellu er hann hlaut 8,72 í aðaleinkunn sem skiptist í 8,48 fyrir sköpulag og hvorki meira né minna en 8,88 fyrir hæfileika. Foreldrar hans eru Ómur frá Kvistum og Kantata frá Hofi.

Hrossaræktarbúið Hamarsey mætir jafnframt með sína fulltrúa. Inga og Hannes í Hamarsey ætla að tefla fram frábærum klárhryssum á sýningunni. Þar á meðal eru Sóldögg frá Hamarsey undan Frakki frá Langholti, Þoku frá Hamarsey undan Herjólfi frá Ragnheiðarstöðum, Sóllilju frá Hamarsey undan Hákoni frá Ragnheiðarstöðum og Íslandsmeistara síðasta árs, súperklárhryssan Júlíu frá Hamarsey.

Hamarsey hefur getið sér gott orð á síðustu árum þó hrossaræktin sé ung. Búið var tilnefnt til verðlaunanna 'Hrossaræktarbú ársins' síðastliðið haust en í fyrra komu meðal annars fram þrjár hryssur frá búinu sem allar fengu 9,5 fyrir tölt. 

Það verður spennandi að sjá þessar stjörnur dansa um salinn á laugardagskvöldið.