laugardagur, 17. nóvember 2018
 
TölublöðVenjuleg útgáfa

Samningur um hnitun reiðleiða og landfræðilega kortasjá

17. maí 2010 kl. 11:03

Samningur um hnitun reiðleiða og landfræðilega kortasjá

Landssamband hestamannafélaga (LH) og Loftmyndir ehf. hafa undirritað samning um afnot af landfræðilegum gögnum í eigu Loftmynda og þjónustu þeim tengdri. Myndkort af öllu landinu með 0,15 m. upplausn í þéttbýli, 0,5 m. í dreifbýli og 1 m. á hálendinu verða afhent með WMS þjónustu, einnig er sýnt vegakerfi og örnefnaskrá Loftmynda.

Settur hefur verið upp hugbúnaður ( u- DIG ) fyrir starfsmann LH sem gefur færi á að hnita reiðleiðir sem sjást á loftmyndunum. Einnig er hægt að lesa inn GPS mældar reiðleiðir. Loftmyndir setja upp kortasjá með áðurnefndum myndkortum og öðrum þemum sem eru á hefðbundnum kortasjám Loftmynda. Einnig verða settar inn reiðleiðir LH sem þegar hafa verið hnitaðar.

Samningur þessi er í raun framhald af þeirri vinnu sem sett var í Kortasjá 2008, en þá voru settar inn um 75% reiðleiða á Suðvesturlandi. Auðvelt verður að skipuleggja lengri eða skemmri hestaferðir af Kortasjánni. Þegar smellt er með músarhnappnum á reiðleiðirnar skipta þær litum og gluggi opnast með upplýsingum um upphafs og endapunkt ásamt lengd í km. Þá verður útbúið númerakerfi fyrir reiðleiðir í samvinnu við Vegagerðina. Möguleiki verður á að taka reiðleiðir beint inn á GPS tæki eða tölvur af kortasjánni. Eingöngu verða settar inn reiðleiðir sem eru á skipulagi viðkomandi sveitarfélaga, einnig gamlar þjóðleiðir.

Möguleikar eru á að setja í Kortasjána upplýsingar um alla þá aðila sem með einum eða öðrum hætti þjónusta og selja vörur til hestamanna. Má þar nefna t.d. gistimöguleika á hestaferðum  (s.s. uppl. um áningastaði, fjallaskála, bændagistingar, hótel ofl.), reiðskóla, hestaleigur, tamningastöðvar, hrossaræktarbú, fóðursala, ofl.ofl.

Hugmyndin er að auðkenna þjónustuna með ákveðnum táknum í Kortasjánni. Sé smellt með músarhnappi á viðkomandi tákn opnist gluggi með upplýsingum um þjónustuaðila, tölvupóstfang og linkur á heimasíðu viðkomandi.