miðvikudagur, 21. nóvember 2018
 
TölublöðVenjuleg útgáfa

Ná ekki að bora í gegnum íshelluna

24. febrúar 2010 kl. 15:51

Ná ekki að bora í gegnum íshelluna

Ístölt Austurland 2010 fer fram á Móavatni við Tjarnarland n.k. laugardag. Vegna þess hve lélegur ís er í Egilsstaðavík reyndist nauðsynlegt að finna keppninni öruggari og betri stað.

Móavatn er rétt við Tjarnarland í Hjaltastaðaþinghá, ekki svo mörgum kílómetrum utan við Eiða. Þar er aðstaðan eins og best verður á kosið. Sér í lagi er góð aðstaða fyrir keppendur í Tjarnarlandi. Við Móavatn þeirra Tjarnarlandsfeðga hefur verið byggt glæsilegt hús sem nú nýtist sem þjónustuhús fyrir Ístölt Austurland. Gott getur verið fyrir áhorfendur að taka með sér aur eða plastkort til að láta fé af hendi rakna í veitingasölunni.

Móavatn er gaddfreðið þessa dagana. Svo rækilega frosið að ekki hefur enn fundist nægjanlega langur bor á Héraði til að sannreyna þykkt íssins. Lengsti borinn sem hefur verið prufaður er um 60 cm langur og náði hann ekki í gegnum íshelluna.

Eins og áður er það Hestamannafélagið Freyfaxi sem hefur veg og vanda að Ístölt Austurland, sem fyrir löngu er orðinn árviss viðburður. Ennþá er opið fyrir skráningar og rennur skráningarfrestur út á fimmtudagskvöld kl. 22:30. Skráningargjöld eru kr. 3.000,- og innheimtast á staðnum. Skráning fer fram á freyfaxi@freyfaxi.net Nánari upplýsingar um staðhætti, skráningar og margt fleira veitir Einar Ben Þorsteinsson í síma 896-5513. Keppni hefst kl. 10:00, stundvíslega.

Keppt verður í eftirtöldum flokkum:

Tölt unglinga
Tölt áhugamenn
Tölt opinn flokkur
A-flokkur
B-flokkur
Skeið 100m