þriðjudagur, 25. september 2018
 
TölublöðVenjuleg útgáfa

Búnaðarþing í stríð við þéttbýlið

3. mars 2010 kl. 22:43

BÍ skoðar sér landsmót fyrir kynbótahross

Búast má við að átök um Landsmót hestamanna harðni verulega í kjölfar ályktunar sem Búnaðarþing samþykkti í kvöld. Í henni felst meðal annars hótun um að kljúfa kynbótasýningar frá Landsmótum hestamanna í núverandi mynd og halda sérstök landsmót fyrir kynbótahross.

Bændasamtökin taka einnig afstöðu gegn þéttbýlisstöðunum Reykjavíkurborg og Akureyri og hyggjast beita sér fyrir því að Landsmót hestamanna verði aðeins haldin á landsbyggðinni og að mótsstaðirnir verði tveir, Vindheimamelar og Gaddstaðaflatir. Þetta kemur fram á vef bændablaðsins: www.bbl.is. Fréttin hljóðar svo:

Landsmót verði í Skagafirði og við Hellu

Bændasamtökin hyggjast beita sér fyrir því að landsmót hestamanna verði haldin á landsbyggðinni og að landsmótsstaðirnir verði tveir, Vindheimamelar í Skagafirði og Gaddstaðaflatir við Hellu. Búnaðarþing samþykkti þetta í ályktun sinni nú í kvöld.

Sömuleiðis kemur fram í ályktuninni að skoða skuli hvort ástæða sé til að skilja sýningarhald kynbótahrossa frá núverandi fyrirkomulagi og halda sérstakt landsmót fyrir kynbótageirann.

Eins og kunnugt er hafa staðið miklar deilur að undanförnu um þá hugmynd að halda landsmót árið 2012 í Reykjavík. Bændasamtök Íslands eiga þriðjungs hlut í Landsmóti ehf. sem hefur séð um mótahaldið. Ályktun Búnaðarþings gæti því vegið þungt í þeirri umræðu.“